КФХ «Цикам»

Загьматвелди инсандин джандис сагъвел, кьуват ирцIанде агъа мисала аяфе авалдин вахттарихъас хаб. Загьмат акьас инсандихъ сабур хъай кканде, акьу кардин хайирна муфеIет агвас. Хьес джалабурис аргвай агьалдин заманайи хIурариъ экьуна курар аркьай дуламишвелар акьас ккане инсанар чукь хьуна аяф. ХIапай гьалдин джигьларин мурад э шагьурариди айчIуна Iуьмур гьикас. Багьана ме кардис, хIурариъ ая джегьиларис гьуркIу кар адавахIела. Хьес джалабурис ягIа курарис шагьурари мункинвел ппара аяф. Миштти идегуна, сайрак са-са хизан аяф хIурариъ мал-къара ухIай чиппин дуламишвелар аркьай Iуьмур гьикас кьастт аяттар шагьурариъ ая мункивеларис, ачухъвеларис хъуттудурфуна. ХIапай миштин дуламишвеларис кьастт аттар э варха хIурари ая инсанар.

Сад мишттин инсанарикес э игит Маллаев Ариф Зафиравич. Ге дуламиш вея учин хизандихъай Буршагъарин хIуриъ. Ариф Зафировичахъй чин гъургъуна ахъакьуне час учин Iуьмурдихъас, фи четинвелар айчин хIурариъ мал-къара ухIай дуламишвеларихъас.

Маллаев Ариф хуфе Агъул районди Буршагъарин хIуриъ хIа хизандигI. Дадар-бабари Арифан дуламишвелар акьуттаре хIуриъ. Ая мебур Iу чуна Iу чи. Хъай уйи хIададна хIабабра. КIилди мебурин хизандиъ уйи муя инсан. Ариф бицIигунахъас хаб зиринг кардиъ гIешкъ ая шиниккв э. БицIи ами дадар-бабарис кумак аркьай хьуная хулан курарис.

-Зун хьибудпе классиъ ая вахттари гIешкъ вей уйи зе хIададахъай малар-хIуппарихъ вес. ХIададна хIабаб дуламиш вей уйи багулив фая Цирхьеарин Iуриъ. ХIабаб че цирхьеаринф э. Махьтабари ая вахттари зун гъузуна уйи каникулар мус хьасегьан агъай хIададалди вес кумак акьас. Захъ хъая илдешар джалабур каникуларихъ гъузуна авейи шагьурариди вес, зун вей хIададалди гис гъил гьучихьас. Хабди махьтабарин хурубар ккиркIуна зун учIуне хурас Дербентин институтиъ «Юждаг» агъа мукьуйи инженерарин курсариъ.

24-пе июньди 2006 пе иса ккиркIуне зе хурубар. Зун хурубар ккиркIу вахттари хье хIуькуматин гIедатари аттархьуна уйи Крестьянское фермерское хозяйство (КФХ) агъаф. Гьер инсандин кьасттна гIешкъ са усахъди хьегуна йиркIура ая кардихъди рекъ ачухъ ве. Гьемиштти зунра кьастт акьуне арайил акьас савдагардин кар. Ке удигьай малар зун гъушуне Дахадаевский райондиас, хIадада насихIет акьуна. ХIадада учира ппара ухIайи малар, хIуппар джегьил вахттари. Те дерейин джинс иджеф хIисаб аркьайхIел хъара ухIасра рехIети э хье мукьариъ. Гьемиштти гьер истти гъуланди хьуне чин багулив фая хIурариас малар, хIуппар. Хъара кумак хьуне дадар-бабарин багу-кIиларин.

2020-пе иса зас аттархьуне тендр. Тендр аттархьуна хIуькуматин багухъасра кумак хьуна зас мункинвел хьуне зе шейар гъас Махачкалайиди ярмаркабуриди. Садпегелай зун файшуне рукъу яккна чIетте якк. Тегуна ппара тегIрифар хьуне зе сурсатарис, хъара тIалаб аркьаттар хьуне сасрагелай алтухъди гъарегъилди. Хабди зун хъара гъушуне варвар. Iудпегелай зун ярмаркайиди верегуна файшуне уьттара. Кьанди хье Агъул райндин хьуная ярмаркайиди файшуне зун че КФХйин сурсатар. Че КФХайин ттур э «ЦИКАМ».

Цикам пунаф фас пучина, зун малар ухIа мукьуйин ттур идехIела. ЯгIайин ягъас зун ппара рази э зе кардил. Ая кумак багу-кIиларин багухъас хIуькуматин багухъасра, хъара зун аркьая кардил рази э зе хизан, шиникквара. ДехIела засра зе кар кьабулди аяф. Е загьмат адай курара верефттава.

Наибет Гасукаева