ЦIакIинарин гIедатар

Авалан вахттари джигьил шиниккварна шибер сад сайихъай гьучархьайи Iари маджисарил, цIакIинарил, гьер джурейин мегIракабурил. Шиберис ахттигьар адавуйи шувас вес даданра бабан разивел фудавай. Дадна баб андавахаб, ададарин-абабарин ахттигьар фай кканди. Шиникквдира гIаттивайи учис сус даданра бабан разивел фай.

ЦIакIин акьасттегьен рушасна кIиркIас Iудара хъай мегIракабурилди вес ахттигьар адавуйи. КIиркIафас учин дадасна бабас пас вереф давуйи учис кканхьуна рушахъас. Ги хъучикафи учин дустт, чи, муш кея инсан уп пуна ге рушахъас.

Сасра ягъан гIуьбехъми кIиркIан дадна баб верефи рушан хулади, гин дадар бабарилди, ге нан пас чиппин кIиркIас хьирди. Рушан дадар-бабари завал акьунавейи чиппин багу- кIилинттар. ЯгIарвелар аркьагуна, хъуттурфанди гебурин девлетихъ, тухумдихъ, мегIнайихъ.  Гебурин джуваб агухаб, фадихьайи берхIемин кьумаш, ягълукъ, хъикIайи тIубул, хъара ирцIанди гьер джурейин савкьатар.

Авала сусахъай ирцIанф и уза джилар, уца мукьар, ифан гаджинар, малар, хIуппар. Гебур кидавай, наврузбегди кIилилас лекулди рукьуна аликIайи сусал, кIилди гин багу кIилинттарилра кунарна лекар. АцIуна агъуларин джигьилар, сус хъаттийихаб, вейи лиханас гьер шагьурариди кIилин исардалди, пул къазалмиш акьас.

Шиберисра лап бицIи ами хIезур аркьай хъучучIафи ахъарта задар: кьвадилкьванар, Iуьрдеккенар, ахунар, лехIефар, гвегIенар, кьумашар, дасмалар, хъара гьер джурейин задар.

Хъаттийина Iу-хьибу ис верефи цIакин аркьагунас. Ама, гьегидегьен гагьди шиникквдивас учин сусалди хулади вес верефттавуйи рушан дадар-бабарин ахттигьар фудавай. Хабди, ахттигьар йихаб, навризбегдифас вес верефи хулади сусалди.

ЦIакIинарил алверефи кIилди хIур, бицIиф, хIаф дагъай. ЦIакIин верефи хьибу-якьу ягъди, алихьуна дамдаминра сунайин ун. ЦIакIинарис хIезур аркьафи ракьна нирхIин аш.

Сагелай цIакIин аркьафи рушан хулаъ. Завалхьуна джала къучмабур сусан, аркьайи мегIнибур. Iуьшуй аркьайи рушан къатир. Къатир ая хулан кIилди цалар кехъуна аверефи кьасусттира.

Садпе ягъа кIиркIан цIакIинин, багамикестти алгъучIуна наврузбеген хулан хулагъил, атафи далдамна суна, кIилди хIурин инсанарис  унихьасттегьен. Ге шаб че цIакIинилди агъа чIал и.

Апкьанис навризбег учин дусттара хъай аттушуна верефи хулаас, сасадар хIуриасра кехIей верефи. Са бицIи гагьдилас гихъас руцас верефи гин чуппар, чияр, багу кIилинттар, цIакIинилди адина гIалашувар, фай суна далдамра. Ке удигьаттарив фаверефи ифан хIа тIабакI, гьер джурейин Iелеттар, ухаттар аяф.

Навризбегна гин дусттар гьучархьугуна, ирцIанфи гебурис Iеле-ухафра, минат акьуна, гебурин ккане-дакканфра акьуна, аркьай мегIнибура, гъарефи гебур хаб хулади. Хулади верефи мазгитан удигь ая гимиас. Гисаъ завал хьуна аверефи кIилди хIур, бицIиф-хIаф дагъай. Сур алгъучIуна аверефи хулагъарил, чиппис батIарди агвас. Са къирагъиъ гимин эркьвафи навризбегна гин дусттар, удигь ухаттарин, Iелеттарин хIа тIабакIра агьийина. Ама наврузбегес фера ухас, IуьтIанас ахтигьар адавуйи. Аркьафи гисаъ ппара тамашибур, аверефи IапIкьунар.

Iудпе ягъа гIуьбехъми лихъванди сусна навризбег. Ге лихъуниас хъадикlина, гъайи навризбег дусттари. Навризбег хъадикlиттарис аркьайи IуьтIуб-ухуб.

Лехъун акьухаб, ачагъарефи сус хулади. Хулади ачагъарегуна, алархъайи сусалас шаккар, ачафайдегуна ирцIанди гис  уьтт.

Iуьшан арайиъ дусттари гъайи навризбег сусалди хулади. Суса ирцIанди гебурис учихъ ахъатуна сусан кьутIурар. Багами вейи сусалди джала багунттар, гебурис цIае хизанар мубарак акьас. Суса джалабурис ирцIанди гвегIенарна хъунджика ягълукъар. Iайи хIа багунттарис ирцIанди хъара сасра задара.

Хьибудпе ягъа, хъай джала джигьил шибера, хумбара гъайи сус булахилди  хьеттилди, хъахъуна гвара. Са идеми хIезурди экьуна авейи сусан гвар хъаттивас. Ги хъаттивуна гвар, адатуна сачIукь хьедра, хаб хъиланди сусахъ ге гвар, агъай гис ацIуна батIар чIалара, аркьай идже дуьгIебура. Ге гвар хъаттиву идемис ирцIанди батIар Iелеттари ацIу тIабакI са гIерекьин шушара икIуна. Ме гIедат акьуна ккиркIухаб, вейи ге сусакес гебурин хIекьдан хизан.

Гьал шиникквди э учис сус гIаттиваф. Руш шувасра учис кканеттис э вереф. Iайи гуджар дадар-бабари шиниккварис аркьайдава. Агьалдин цIакIинариъра аме авалдин гIедатар, амма сур гIедатар аркьай андава. Гьалдин цIакlинарин усттуларил алдафра авейдава. Ямагара гьер джурейинттар аве. Сад сайилас бехIсунилди батIарди акьас цIакIинар алучIа.

Нафият Шамсудинова